Schrijven Twentaal Corrigeren Twentse taalproducties Producten Referenties Nieuws Contact

Nieuws

woensdag, 5. januari 2022 - 22:24 uur
Mogen mut neet meugen

Ik heur Max Verstappen nog neet dreks zeggen: “In 2021 mocht ik het wereldkampioenschap Formule 1 halen in Abu Dhabi.” Of Messi: “Ik mocht in 2021 de beste voetballer zijn.” Mear op LinkedIn is zuk soort week gekuijerte de voertaal ewörden: “mogen” vuur en “mogen” achter. Börgemeasters “mochten burgervader zijn van onze mooie gemeente”, wethoolders “mochten het afgelopen jaar goede mijlpalen bereiken voor onze mooie gemeenschap”. Oondernemmers “mochten producten leveren aan mooie klanten” en ZZP’ers “mochten mooie klussen doen voor opdrachtgevers”. Kearl-an-gen-eande: mag, mogen, mochten…het trekt miej zeute oawer de tonge. De versofting van LinkedIn is compleet.
Was dit zakelijke netwoark eerst vuural bedoeld vuur oondernemmers um mekoar makkelijker te veenden. Doar köm al gaauw de klad in. Dat begun met het vermeelden van allemoal cursussen woe’j nen blauwen moandag an met hadden edoan en dan een fantasiecertificaat vuur kregen. Ook opleidingen en universiteiten zoonder diploma ko'j der gewoon op zetten. Schriewt er twee joartallen achter en geen meanske zut da’j nooit eslaagd zeent. Ook al he’j in Rotterdam allene biej de roeivereniging ewes, dan lik ’t op LinkedIn net o’j ne economiestudie an ‘t Erasmus hebt edoan. “Beetje kojt, maaj de stof was mij te theoretisch,” kö’j dan aaltied nog zeggen. Kloar-loeder window-dressing: het hoof neet woar te wean, at mear mooi steet.
Vlak doar achteran köm de nieje lichting jonge oondernemmers dee verestig elken dwarsweend op LinkedIn zet. Doar reageert dan wier aandern op met keenderachtige klapheandkes en stimuleringshartjes. Complete communicatie-ofdelingen zeent de hele wekke drok met mekoar oawer ’n kop strieken en oonder ’n buul. En a’j het woord “mogen” goat törven, dan red iej dat neet met één potlood. In Twente neume viej det: nederigen hoogmood.
Loa’w earlke wean. A’j as oondernemmer gewoon strak woark ofleawert, tegen ne fesoenlijke pries de’j vuurof dudelijk hebt of-esprökken, dan vaalt ‘r niks te meugen. Dan he’j ’t gewoon leawerd en hoof iej oe neet as nen daankboarn kroephoond te profileren. Broene oarme tot an ’n elleboam zeent de slechtste garaantie vuur tookomstige successen.

Vake wordt 'r ook neet biej noa-edacht. Ik heb dit allemoal ezegd in Riessen tegen nen jongen oondernemmer den machtig good woark ofleavert. Hee hef het zeikwoord “mogen” dreks van LinkedIn of-ehaald. Der is nog hoppe vuur 2022.

Gerrit Dannenberg


dinsdag, 28. december 2021 - 10:18 uur
Altijd-een-Twent-lullefecatie

Iej hebt topsporters en aandere carrièremakers dee al joaren boeten Twente wont. Doar zeent eagenlijk altied heel logische readen vuur. Heel völ specifieke carrièrekaansen kom iej hier neet op de kwadraatkilometer tegen. Twente is non eenmoal een röstig laandgood. Niks um oons vuur te schamen.

Toch vernem-iej alverdan nog heel völ Twente-schaamte. A’j op de Twentse media ofgoat, zi’w bliekboar allene mear greuts op oonze Twenteverloaters. De bladen komt tot vervelens too anzakken met ex-Twentenaren dee hier al een leaven laank weg zeent. Het niejste lifestylemagazine Twentelife zet dichteres en NRC-columniste Ellen Deckwitz breed too in völle woord en heel mooie beelden. Ik leaze de NRC al ’n meanskenleawn, mear vuur het eerst leus ik dat dat Deckwitz nota bene oet Boarne koomp?! En hee zeg: “Ik ken de codes, spreek de taal, ruik de geur – niet de meest briljante geur ter wereld – maar het ruikt als thuis.” Iej zöalt verestig in Boarne wonnen en zukke dinge leazen...?!
Oonzen Martin ter Denge steet ‘r ook in; nen strakn column oawer de waardering van het Twents. In mooi Hollaands, dat wal, mear gelukkig zi’w in Twente meartalig.

TC Tubantia hef ook zonne wekrubriek van Twenteverloaters. Altied leas iej dan: “Ik kom er nog wel eens met verjaardagen.” Of: “Het is direct weer vertrouwd.” En nog veaker: “De knik in de IJsselbrug bij Deventer voelt als thuiskomen.” Inderdaad: thoeskommen, mear vuural neet te lange bliewen. En dan volgt dee hagelsteendomme slotvroage: “Eens een Twent, altijd een Twent?” As ze dan earlke zoln wean, munn ze gewoon zeggen: “Tuurlijk niet, anders was ik er toch wel gebleven!?” Mear altied koomp der dan het sociaal geweanste antwoord: “Zeker, want ik hou van dat Twentse doe-maar-gewoon-dan-doe-je-gek-genoeg.” Net of ze doar allene in Twente van hooldt.

Astebleef loa’w oetscheaiden met dee verhalen oawer Twenteverloaters. Der zeent echt genog leu in Twente dee hier oet oavertuging wont. Leu dee hier ook hele mooie dinge maakt en doot. Leu dee laank of kort geleden hierhen kömmen en zeent eblewen. Oawer dee leu wil ik leazen, want dee hebt echt wat te vertellen oawer Twente. Ze hoownt van miej zelfs neet verplicht Twents te doon, gin Twentse codes te kennen, want ze hebt vriejwillig vuur oonze contreajen keuzen en det is al mear as genog. An dee leu mu’j vroagen: “Eens een Twent, altijd een Twent?”

Gerrit Dannenberg

woensdag, 22. december 2021 - 22:21 uur
Een klassieker: Kaarsje Klokje Kerkje

Een kaarsje en een klokje en een kerkje.
Wat witte weemoed en een tikje grijze spijt.
En van de koning tot het allerkleinste klerkje
Een paar gedachten over moeder aarde en vader tijd.
De engel in de boom fluistrend beloven
Dat je op 2de Kerstdag met je eerste goede daad begint
En tussen ‘Vrede op aarde’ en in de mensheid geloven
Gewoon weer denken: 'k hoop dat Ajax morgen wint.

II
Een kaarsje en een kerkje en een klokje
Een kerstdinertje - alles wit en haast geen zwart
Tien vrome woorden overgoten door een slokje;
Een vette kerstgans naast een min of meer vermagerd hart.
Een kerstboom, die de pakjes niet kan torsen
En voor zo'n feestdag net een tikkeltje teveel geschreeuw
Een grammofoon, die ‘Stille nachtjes’ staat te morsen
En 'n vaag verlangen naar alleen zijn in de sneeuw.

III
Een kerkje en een klokje en een kaarsje
Een combinatie van de stal van Bethlehem,
De herders en het kindje in de houten kribbe
Je nieuwe asbak en naar huis gaan met de laatste tram
En in de nacht naar vreemde sterren staren....
Excuses maken aan je eigen hart,
Omdat je weer - als alle jaren
De Kerstmis met een kermis hebt verward!

Wim Kan, 1954

zaterdag, 11. december 2021 - 19:49 uur
Van Gaal oawer corona

Zelfs Louis van Gaal har ne meaning oawer het functioneren van de regering. Völ miej van um tegen. Biej al dee vrachtwagens vol corona-borrelwiesheaid, ha’k Van Gaal wiezer willen hebben. Mear nee, Rutte en De Jonge deden het heelmoals verkeerd. In Portugal – hee woont doar - hadden ze het völ en völle better edoan.

Hier in Nederlaand he’w een RIVM en ne regering den bekik hoe der vuur alle moatregelen genog support blif en oonderwiel de economie toch gangs köant hoolden. Mer de leu dee vuur oons dizze koare trekt, doot aaltied alns verkeerd. De in-eantingscampagnes doot neet heelmoals wa’w ehopt hadden en dan wordt de commentaren harder, feller en vuural onredelijker. Doarumme har Van Gaal gewoon mutten zeggen: “Corona? Ik heb de haande vol an det gefoebalte.”

Achterof commentaar gewen is heel makkelijk. Eerst schreeuwt de Tweede Kamer um keaihard ingriepen tegen de Bulgaren – wee’j nog - dee ne Nederlaandse oetkering oet de mure trekt met nen seempeln pinpas. Dán klaagt de Kamer det de fraude te hard wordt an-epakt. Belastingfraudeurs mossen van de Kamer streng worden bestreden en dan koomp oetgerekkend Aleid Wolfsen oons vertellen dat potentiële fraudeurs völs te strabaant wordt behaandeld.

Wiesheaid achterof, deskundigheaid met de kennis van nou, klokigheaid van de koolde groond, verstaand oet de draankfleske; vottemet! Want, hoe doo’j dat? Maakt ne woarkgroep van geliekgestemden, zet de harsenkroonkels op mooi glad papier met een deftig logootje, nen glossy umslag, een stuk of wat intellectuele voetnoten en iej hebt een rapport. Kö’j in talkshows nog wekken laank ’n alwiezen broadhaan oethangen. Vuural zeggen hoe ’t neet mut en vuural neet hoe ’t wal mut.

Het is een groot vuurrecht da’w mekoar aaltied de woarheaid recht vuur ’n kop mangt zeggen. Ook polletieke partiejkes dee allene mear schreeuwt oawer een heel smal stukske van de brede problemen van dizzen tied. En desnoods nog hard ropen dat ’t almoal heel aanders har emut, det corona een gewoon griepje is woe’j mangs iets te vlot an doodgoat mear-noh-jea-het-leawen-hef-non-eenmoal-risico’s. Iej mangt van miej ook röstig zeggen dat vaccineren wál mut of juust neet. Dat Jaap van Dissel nen tuinkabouter is of Ab Osterhaus nen oetgerangeerden veedokter. Almoal prima. Mear Van Gaal oawer het coronabeleid…

Ik kenne machtig sympathieke vrachtwagenchauffeurs. Iej maakt ze niks wies oawer vrachtwagens. Mer ik har ze neet geane as minister van verkeer.

Gerrit Dannenberg

zondag, 17. oktober 2021 - 21:45 uur
Eczeem: literaire maar toch mooie gedichten in het Twents en Nederlands

Hoe klinkt de Dodenrit van drs. P in het Twents? Of Het carillon van Ida Gerhard, Mijn gebed van D.C. Lewis, De blauwbilgorgel van Cees Budding' of The Ballad of Mauthausenvan Mikis Theodorakis? Een boek vol mooie poëzie in mooi Twents en Nederlands.

Eczeem, hardcover,
160 pagina's, €19,99- (in de winkel iets duurder)
ISBN/EAN 978 908 315 980 5
dannenberg@twenthetekst.nl


Nieuwere bijdragen  Oudere bijdragen

Aanmelden