Nieuws
maandag, 30. december 2024 - 22:03 uur
Töafelkes-oawend 31/12/24
Op Töafelkesoawend goat völle leu drammen oawer vrooger. Vaste umda’w van vrooger de ooldejoars-conference op töafelkesoawend hebt oawer-eheulden. Wim Kan wes dé kearl van dee joarsloetings. Den van 1979 he’k nog op ne klassieke cassette.
De formule is nooit veraanderd: nen binnenkommer, een inleaidend pröatje, een versje, een verhaaltje en an ’t lesten stichtelijke wöarde vuur ’t nieje joar. De oalejoarsconferences hebt aaltied een hoog met-de-wetenschop-van-non-gehalte. Aaltied makkelijk scoren. Achterof kiek iej ne koo in ’t gat en wordt hoaste alns net zo lachwekkend as de kapsels op oale trouwfoto’s. Want hoe geet dat? Dit was dom, dát was neet klook, zus har heel aanders eköand. Vake geet ‘t ook oawer dinge dee niks van doon hebt met de echte besloet-bekwoamheaid van oonze gezagsdreagers. Dit joar zal ’t dan ook wal vuural goan oawer premier Schoof zin vriendin, de höare en de kleare van minister Klaver en de verweande gölbuujn van Pieter Omtzigt.
Het leste bleadken van ’n kalender blíf nen moojn earns um eawen achterumme te kieken. Mer wat heure wiej in de ooldejoarconferences? Spitsvoondige dinge van een conferencier? Taalvoondsten van nen woordkeunstigen kearl of vrouwe? Óf vaalt ‘r nog wat te learen? Fouten make wiej allemoal, mear fouten achterof anwiezen en dan keihard zeggen det ’t aanders har emut is ginne grote keunst. Nöast Wim Kan hebt aandern ook probeerd het eandejoars-oawerzicht oaver te nemmen. Mer het blik nog wal ne hele opgave um een lesten oawend van ’t joar de leu te loaten lachen én te loaten noadeanken. Hoaste onverennigboare dinge a’j ze beaide serieus nemt. Zelfs Finkers hef der heel klook an edoan um het noa één keer nooit wier te proberen. Youp van ’t Hek köm der oarg dichte biej: hee dwung de leu in ’t speegel te kiekn. En dan mut ’t wal gek goan da’j neet um oezelf munn lachen. Dit joar dut Pieter Derks de joarsloeting.
Töafelkesoawend; een naam koomp van de ettenstoafel den ’t vroger allene op ooljoarsdag propvol steun met alle soorten vleais: gebroaden sauciezen, kerbenades, ribben en rollades. Met de kennis van non is ’t extra genieten van al det lekkere vleais. Met Pieter Derks mu’j ’t mear ofwochen.
Gerrit Dannenberg
dinsdag, 24. december 2024 - 21:30 uur
Canite Tuba! (“Steek de bazuin”, Advents-antifoon)
Hoalt n doed’lendn hoorn hoog boavn de putte.
Kniept vast oewe lipp’ op de vleerhoaltn spool’;
En bloast den Adventsroop van Vass’ tot de Lutte,
Van Soasel noar Lattrop tot wied oaver n poal!
En is Mirreweenter het Keendke geboorn,
En zeengt weer de Engeln hoog’ oet et heelal;
Stemt dan noar de fluitn van d’Herders oewn hoorn
En wiest de Dree-Könn’ge de weg noar de stal!
Noar: Toon Borghoes, Ollenzel, ’n Buske late bleujers. Gedichten het jaor rond.
Nedersaksische Uitgeverij en H.O. Twentse Post Hengelo (O.) - MCMLXI (z. 7)
dinsdag, 17. december 2024 - 08:19 uur
Eandejoars-liestjes
Kampioenen zi-w gek op. Miskien wal umda-w zelf stiekem geane óók ’n besten weelt wean. Viej zeent ook gek op eande-joars-liestjes, fealijk ook een soort van kampioenen. In disse wekken leaze viej oawer: ’n voetballer van het joar, politicus van het joar, de meest bewoonderde vrouwe van het ’t joar. Opiniewekblad ’n Roskam hef een besten Tweantsen bestuurder van ’t joar… Alleman weet gloepens good dat de liestjes een hoog flauwekulgehalte hebt. En toch wille viej oons geane oarns an spegeln. ’n Besten zanger, een besten singer-songwriter, een besten Heel-Holland-bakker, een besten wielrenner, ’n besten Max Verstappen.
Mer an één liestje is de ofgelopen wekke een eande kömmen: de Miss Universe-verkiezingen. Het liestje met de dree meujste vrouwleu van het heelal. En van zukke berichen wor ‘k toch wal bliej van. Neet umda’k neet van mooie vrouwleu hoolde, want der is jums gin mens op de wearelnd den ne mooie vrouwe lellijk veendt. Geeldt vuur nen moojn kearl trouwens ook. Mear wat is de prestatie fealijk? A’j der toevallig good oetzeet kom iej boawen-an ’t liestje. Vuur de beste sportprestaties mu’j in elk geval nog hard vuur woarken…. Mer nen moojn kop he’j gewoon geluk met ehad en a’j dan neet al te völle domme dinge zengt, dan kö’j Miss Universe worden.
Mer non is ’t dan toch echt of-elop met dee commerciële vleaiskuring vuur vrouwleu. Wille viej an leu dan tóch per se ne prieskaarte hangen, dan mu’w méár eagenschoppen op de weagschoale leggen. Wat maakt van leu non fealijk móóie leu. De boetenkaante is allene mear verpakking. Der zeent jums sloepmoordenaars met ’t gezichte van een goodig groffaatje. Neet allene de verpakking, mear de inhoold dut ook met. Tuulk kenne viej allemoal dee versletten zegswiezen det opmaken de botter dut verkopen. En iej hoowt de boetenkaante ook zeker neet te verwoarlozen. Mear um allene vuur ne mooie verpakking ne pries te gewen, dan he-j slim last van blikvernauwing.
Der zeent mear van dee foute liestjes dee nutteloze kwaliteitskenmerken beloont met ne hoofdpries: de Leukste Gemeente van Nederlaand, de MKB-vreandelijkste Gemeente van Nederlaand, de beste fietsgemeente van Nederlaand…. Wat kope viej der toch vuur? Loa’w der gewoon met oetskeajen. Eén eandejoars liestje wi-k nog anhoolden. Det is het liestje det ook aaltied woar is en wat miej aaltied een heel good geveul gef umda’k der neet op stoa. Det is det liestje met leu dee ’t vergangen joar oet de tied zeent ekömmen.
woensdag, 11. december 2024 - 18:16 uur
Veehandelaren uit Twente en Salland
Veehandelaren in Twente en Salland
Rijssen: Harbers, Vossebeld, Nijkamp, Ter Harmsel ('n Duusker), Slagman
Markelo: Welmer, Kevelam, Noteboom
Enter: Coesant, Ten Brinke
Holten: Stam, Aaftink, Ulfman, Jansen, Bunt
Wierden: Kool, Niesink, Spekrijse, Dasselaar, Eggerink, Nijsink, Immink, Dam Wichers
Nijverdal: Veneman, Harmsel, Reimink, Vrielink
Vriezenveen: Aman, Tijhof, Holland, Peulke
woensdag, 29. mei 2024 - 09:53 uur
T-Bone Enter 50 jaar: de naam was geen grap
T-Bone Enter bestaat 50 jaar. Horecamensen van den bloede. De naam T-Bone was geen grap van de bijnaam de Bone.